Ужо даўно стала традыцыяй для калектыва Слабодкаўскай бібліятэкі арганізоўваць для ўдзельнікаў Клуба цікавых сустрэч вандроўкі па роднай Браслаўшчыне. Не стаў выключэннем і гэты год.

20 ліпеня ўдзельнікі Клуба завіталі ў аграгарадок Друя.

Першым прыпынкам вандроўкі стала Друеўская бібліятэка. Бібліятэкар Феклісава Вера Цімафеееўна для гасцей правяла невялікую экскурсію па бібліятэцы. У знак удзячнасці ўдзельнікі Клуба цікавых сустрэч падаравалі Друеўскай бібліятэцы карціну самадзейнага мастака з Браслаўшчыны Яна Рыдзікі.

Наступным прыпынкам стала Друеўская сярэдняя школа. Госці завіталі ў школьны музей.

А мясцовы самадзейны паэт Ваўчок Данііл Канстанцінавіч прачытаў свае вершы пра Друю, Слабодку і родную Браслаўшчыну для рабят з аздараўляльнага лагера “Браслаўская хваля”.

Завіталі ў гэты дзень удзельнікі Клуба цікавых сустрэч і ў мясцовы касцёл Святой Троіцы.

Вандроўка дапамагла адкрыць аграгарадок Друя па–новаму.