Новыя тэхналогіі актыўна ўкараняюцца ў дзейнасць сучасных бібліятэк. Вось і Браслаўская цэнтральная бібліятэка 7 снежня ўпершыню ўдзельнічала ў відэаканферэнцыі “Ад Года культуры – да Года навукі і 500-годдзя беларускага кнігадрукавання” і вебінары на тэму “Фарміраванне і прасоўванне рэсурсаў бібліятэк у электронным асяродку”. Вебінар – гэта мерапрыемства, падобнае на звычайны семінар з дакладамі, паказам дэманстрацый, пытаннямі і адказамі, але праходзіць ён у рэжыме рэальнага часу праз Інтэрнэт. Ініцыіравала гэта мерапрыемства Віцебская абласная бібліятэка. Падчас вебінару спецыялісты Браслаўскай і васьмі іншых бібліятэчных сістэм вобласці атрымалі кансультацыі па пытаннях планавання дзейнасці публічных бібліятэк на 2017 год, пазнаёміліся з міжнародным вопытам фарміравання электронных бібліятэк, тэхналогіі стварэння электронных выстаў, а таксама з вопытам работы па стварэнню электронных дас’е і базы дадзеных калег з Глыбоцкай і Гарадокскай бібліятэчных сістэм. Новая форма зносін вельмі спадабалася ўсім удзельнікам відэаканферэнцыі – яна эканоміць час і грошы, дае магчымасць аператыўна вырашыць многія прафесійныя пытанні, атрымаць парады па арганізацыі дзейнасці бібліятэк ад спецыялістаў абласной бібліятэкі, якія плануюць праводзіць такія мерапрыемствы штомесячна.
Валянціна Лук’янава, бібліятэкар аддзела бібліятэчнанга маркетынгу